In custa segunda puntada de Beni cun me in Amèrica, bìsito su parcu de Lu Càntaru, acanta de Tàtari, in ue Agostinu e Christian sunt istantargende unu mundu nou, basadu in sa cumpartzidura e su traballu a cumone. Mi contant chi is bìsitas a s’ispissu lassant calicuna cosa in càmbiu de s’acollèntzia, e duncas deo ddis apo a regalare su romantzu Lèbius nche passamus in sa terra, sa tradutzione mia de unu de is prus autores sardos istimados, e chi contat s’istòria de Sardigna in una manera bella diaderu (leghe·nde de prus in su blog meu).
Dae su parcu, apo a regordare duas pitzocas sardas chi apo connotu in Califòrnia. Pro primu, Simona Vacca, una giòvana imprendidora de Orosei chi at abertu una geladeria in West Covina, e chi m’at a fàghere tastare is gelados suos cun sabores noos, chi ddi ant fatu bìnchere prèmios, comente su geladu de tzaferanu de Sardigna.
 Simona Vacca |  Franca Bulloni |
A pustis, Franca Bulloni, educadora e atora de Bitzi, mi contat comente si bidet Sardigna dae Hollywood. Gràtzias a custa connoschèntzia in Beni cun me, Franca at atzetadu pagu tempus a pustis de protagonizare su vìdeu de sa cantzone mia «Non bido s’ora», de su discu De Sardenya a Califòrnia (2024). Est istada un’esperièntzia bella meda a registrare in paris cun issa custu vìdeu in Califòrnia, e ddi torro gràtzias meda!
Pro serrare, Silvia Pilia, cantadora in lìngua turritana, m’at a contare comente is biàgios chi at fatu in su mundu alimentant sa mùsica sua. Is parres de totu custas fèminas biagiadoras m’ant a agiudare a detzìdere si su logu miu est in Califòrnia opuru in su Mediterràneu.
