De Sardenya a Califòrnia no est isceti su tìtulu de s’ùrtimu discu cosa mia. Est puru s’istòria de comente so lòmpidu, in su 2021, in is Istados Unidos (IUA), cun unu cuntratu de professore de tradutzione pro sa California State University Long Beach, e de comente deretu apo connotu a sa comunidade sarda de in cue.
In calicuna manera, est puru s’ispiegatzione de comente siat nàschida sa de duas istajones de «Beni cun me», custa borta dae is IUA. E, dae chi custa est una trasmissione in pitzus de limbas, tocat a reconnòschere deretu chi meda de is topònimos de sa zona derivant de un’istòria de istermìniu dae parte de s’Europa: dae Puvungna (Long Beach) a Abya Yala (Amèrica), torrare a donare sa dinnidade a is limbas minetzadas bolet nàrrere a cumbàtere puru sa toponìmia coloniale. Mancari su tìtulu definitivu de sa trasmissione, mi praghet a pensare chi siat su riflessu de unu protzessu de cussèntzia e de trasformatzione globale: est unu privilègiu a àere connotu, pro mèdiu de sa trasmissione, is natziones originàrias de s’àrea.
In su 2025, in vacàntzia in is prajas de s’Argentiera, torro a addobiare s’amigu Bisenti Porcu, mere de su ristorante Carasau de Culver City, acanta de Los Angeles. In paris, regordamus sa die chi amus invitadu is amistades sardas a chenare totu is delìtzias de su Carasau. Apo a visitare puru sa domo de Mirko Pisu, chi at biagiadu in Califòrnia e at agatadu s’amore.
